జయదేవ్ బాబు గారితో నేను మొట్టమొదట కలసినది 1986 సంవత్సరం న్యూడిల్లీ లో.
1986 సంత్సరం లో "ట్రేడ్ ఫేర్ అధారటీ ఆఫ్ ఇండియా" న్యూడిల్లీ వారు కార్టూనిస్ట్ శ్రీ జయదేవ్ బాబు గారికి "ధూమపానం వలన కలిగే హానికరం" అన్న విషయం పై వేసిన కార్టూన్ కి బహుమతిని ఇచ్చారు. 1983 నుండి 1987 వరకు ఉద్యోగరీత్యా న్యూడిల్లీ లో పాలమ్ ఎయిర్ పోర్ట్ కి దగ్గరలో నివాసం వుండేవాణ్ని. ఖాళీ టైములో పత్రికలకు అక్కడనుండే కార్టూన్లూ కధలూ పంపిస్తూ వుండేవాణ్ని. అప్పట్లో "విజయ" మాసపత్రిక తో పాటే వచ్చే హాస్య పత్రికను జయదేవ్ బాబు గారే స్వయంగా పేజి కార్టూన్ల కధలతోనూ మరియు జోకులతోనీ సర్వాంగ సుందరంగా ముస్తాబు చేసేవారు. జయదేవ్ బాబు గారు ఎంతోమంది ఔత్సాహిక కార్టూనిస్టు ల కార్టూన్ కధల్ని హాస్య పత్రికలో ప్రచురించి ప్రోత్సాహించారు.
"ట్రేడ్ ఫేర్ అధారటీ ఆఫ్ ఇండియా" వారు బహుమతి ప్రకటించినాక బహుమతి తీసుకోవడానికి న్యూఢిల్లీ వస్తున్నట్లు జయదేవ్ గారు నాకు వుత్తరం ద్వార తెలియజేసారు. వూరి కాని ఊరులో జయదేవ్ గార్ని పర్సనల్ గా కలుసుకునే అవకాశం ఆ విధముగా రావడం అదృష్టంగా భావించాను. ఆయన సూచన ప్రకారం ప్రగతీ మైదాన్ లో వున్నా "ట్రేడ్ ఫేర్ అధారటీ ఆఫ్ ఇండియా" వారి కార్యాలయం కు వెళ్లి జయదేవ్ గారు ప్రెజెంటేషన్ ఫంక్షన్కు హాజరవుతున్నట్లుగా వాళ్ళ రికార్డ్స్ లో నమోదు చేయించాను.
ప్రతి ఏడాది నవంబర్ - డిసెంబర్ నెలలో ట్రేడ్ ఫేర్ అధారటీ ఆఫ్ ఇండియా వారి ఆధ్వర్యంలో ట్రేడ్ ఫేర్ని ఎంతో కన్నులపండువుగా న్యూడిల్లి ప్రగతి మైదాన్లో జరుపుకుంటారు. ఎందరో ప్రముఖ కార్టూనిస్టులు కన్నులపండువుగా జరిగిన ఆనాటి ప్రెజెంటేషన్ ఫంక్షను కు హాజరయ్యారు. సతిసమేతంతో ఫంక్షన్ కు హాజరైన జయదేవ్ బాబు గారితో పాటే నేను కూడా అక్కడిచ్చిన అల్పాహారవిందును ఆరగించాను. జీవితంలో నేను అటెండ్ ఐన మొట్టమొదటి అతి పెద్ద ఫంక్షన్ అది.
అప్పటికి నాకింకా పెళ్లి కాలేదు కనుక జయదేవ్ గారు వున్న రెండు రోజులు న్యూడిల్లీ లో ప్రసిద్ది చెందిన "యాత్రి నివాస్ గృహం" లో బస చేసారు. దంపతులిద్దర్ని ఎర్రకోట, చాన్ధినీ చౌక్ లాంటి ప్రాంతాలకు రద్దీ గా వుండే DTC బస్సులలోనే తిప్పాను. అప్పటికి జయదేవ్ బాబు గారి వయసు ఏబది సంవత్సరాల లోపే కనుక దంపతులిద్దరూ రద్దీగా వుండే DTC బస్సులలో ప్రయాణం చేయగలిగారు. ఫోటోలో చూస్తే మీకే తెలుస్తుంది ఆయన యెంత ఎంగ్ గా వున్నారో.
అప్పట్లో ఢిల్లీ పోలీస్ లో భాను ప్రకాష్ అనే తెలుగు సాహితీ అభిమాని కానిస్టేబుల్ పనిచేసేవారు. ఆయన శ్రీమతి I.T.O కి దగ్గర వున్న ఓ తెలుగు స్కూల్ లో టీచర్ గా వుద్యోగం చేసేవారు. ఢిల్లీ లో వున్న తెలుగు సంఘాల ద్వారా భాను ప్రకాష్ గారి కుటుంబం పరిచయమై న్యూడిల్లీ లో నేను వున్నన్నాళ్ళు ఎంతో ఆప్తులుగా వున్నారు. కుతుబ్ మినార్ కు దగ్గరలో వున్న South Extension లో వున్న పోలీస్ క్వార్టర్స్ లో భాను ప్రకాష్ గారు నివాసం వుండేవారు. భాను ప్రకాష్ దంపతులు జయదేవ్ గారి దంపతుల్ని ఎంతో సాదరంగా ఆహ్వానించి మర్యాదలు చేసారు.
స్థలం : న్యూ డిల్లీ , ప్రగతీ మైదాన్ వెలుపల. జయదేవ్ బాబు గారికి వెనుకన నిల్చున్నది నేనే. నా పక్కన చేతులు కట్టుకుని నిల్చున్నతను కార్టూనిస్ట్ విజయ్ అనుకుంటా. తెలియదు జయదేవ్ గారనే అడగాలి.
ఫోటోలో ఎడమవైపు నిల్చున్నతను జయదేవ్ గారి స్నేహితులు.
మేము తీయించుకున్న ఫోటో వెనుక వైపు జయదేవ్ గారు బహుమతి పొందిన తన కార్టూన్ని గీసారు.
Me with Sri Jayadev Babu. Year 1986 - New Delhi - Qutub Minar
బహుమతి పొందిని ఈ కార్టూన్ గురించి జయదేవ్ బాబు గారు తన బ్లాగు లో కూడా వ్రాసుకున్నారు.
